A Deputación de Pontevedra dá comezo este domingo, 30 de agosto, á última quenda dos campamentos da Lanzada, que reunirá a 140 nenas e nenos procedentes de 22 concellos da provincia. Ata o sábado 5 de setembro, os participantes poderán gozar dunha ampla oferta de ocio con actividades educativas, culturais, deportivas e formativas nas instalacións situadas no Grove. Con esta edición, máis de 1.500 menores terán pasado polos campamentos este verán.
Os rapaces chegan de concellos como Vigo (74), Poio (9), Sanxenxo (10), Nigrán (2), Gondomar (3), Redondela (3), entre outros. O Centro de Vacacións da Lanzada, en San Vicente do Mar (O Grove), acollerá estas xornadas.
O programa inclúe deportes como o tiro con arco, orientación, carreira de obstáculos, bodyboard e snorkel, ademais de actividades artísticas, culturais, científicas en lingua inglesa, teatro, contacontos e baile. Tamén se realizarán excursións a lugares como a illa de Ons.
Nesta última quenda, tamén se levará a cabo a elección da mascota que será a imaxe oficial dos campamentos o próximo verán, proposta pola rapazada e deseñada con elementos naturais e reciclados.
