A iniciativa, que xa comezou o pasado venres no Parque Raíña Aragonta co espectáculo Sue Moreno, busca achegar a cultura en clave de igualdade a todas as parroquias, superando a dispersión xeográfica. O proxecto, cofinanciado polo Ministerio de Igualdade e solicitado conxuntamente cos concellos de Salceda de Caselas e Salvaterra de Miño, acadou unha alta puntuación na convocatoria de subvencións do Plan Corresponsables da Xunta de Galicia.
Dous espectáculos principais percorrerán os distintos puntos das localidades. Por unha banda, «Elas», a cargo de Vero Rilo, abordará temas como a loita feminista, a violencia de xénero, a maternidade ou a sexualidade. Representarase en Castro Barreiro o 18 de setembro e continuará noutras parroquias. Por outra banda, «Costureiriña Bonita», un espectáculo de títeres para público familiar dirixido e protagonizado por Cristina Collazo, chegará á parroquia de San Xurxo tamén o 18 de setembro e continuará noutros centros culturais.
O broche final da iniciativa terá lugar o 15 de novembro na Praza do Concello coa representación de “As mil e unha”, unha proposta de narración oral e musical para toda a familia. Todas as funcións do ciclo están protagonizadas por mulleres e abordan temáticas vinculadas á igualdade e ao respecto.
“"Con Sensibilizar para Protexer fomentamos a igualdade real, colaborando coas asociacións culturais e veciñais tan importantes no noso concello e garantimos que a cultura chegue a todas e cada unha das nosas parroquias. Queremos que a nosa veciñanza goce de propostas culturais de calidade e con perspectiva de xénero."
Con este programa, Salceda de Caselas e Salvaterra do Miño reforzan a súa aposta pola cultura descentralizada e a concienciación social a través das artes escénicas, achegando 20 accións culturais ás súas veciñas e veciños.
