O prazo para presentar candidaturas á convocatoria, dirixida a artistas ou colectivos vinculados ao contexto artístico galego, estará aberto ata o 1 de febreiro de 2027. A iniciativa busca explorar novas maneiras de achegar a investigación punteira en física á sociedade.
A residencia desenvolverase de forma combinada entre as instalacións do Instituto Galego de Física de Altas Enerxías (IGFAE), no Campus Vida da USC, e a Cidade da Cultura de Galicia, no Gaiás. O período de desenvolvemento será entre o 22 de marzo e o 30 de maio de 2027. A estadía na universidade poderá ser de tres a oito semanas, mentres que no Gaiás poderá utilizarse por un tempo dunha a tres semanas.
O proxecto seleccionado recibirá unha achega de 8.000 euros para o seu desenvolvemento, ademais de aloxamento gratuíto e asesoramento científico e artístico. A peza finalizada será presentada nunha exposición no Gaiás a finais de 2027. Esta iniciativa é unha aposta conxunta do IGFAE, dirixido por Carlos Salgado, e da Fundación Cidade da Cultura, que dirixe Ana Isabel Vázquez.
A estadía no centro mixto da USC e a Xunta de Galicia permitirá aos artistas achegarse ás áreas de investigación desenvolvidas no IGFAE, os seus obxectivos, métodos e enfoques experimentais, fomentando o diálogo entre estas experiencias e a creación artística. No Gaiás, a proposta contará cos espazos e recursos necesarios para a súa materialización.
As áreas de investigación que poderán servir de inspiración inclúen os elementos fundamentais da materia, os primeiros instantes do Universo, a astrofísica, a teoría de cordas, a física nuclear, os raios cósmicos, os neutrinos, as ondas gravitacionais, o desenvolvemento de detectores e aceleradores de partículas, e os avances en ciencia e tecnoloxía cuánticas.
O formato do proxecto é totalmente aberto, abarcando artes plásticas, fotografía, artes de acción, arte sonora, artes dixitais ou arte participativa, entre outras. Poderá ser unha obra totalmente nova ou a ampliación dun traballo en curso.
Na primeira edición, o proxecto seleccionado foi Outro e sobre si, do compostelán Andrés Rivas Rodís, que explorou a superposición na teoría cuántica a través da pintura. O seu traballo exporase no Museo Centro Gaiás o próximo mes de outubro.
O programa de residencias artísticas do Gaiás, co impulso da Consellería de Cultura, Lingua e Xuventude, apoiou nos últimos seis anos máis de 530 creadoras e creadores e preto de 140 propostas de vangarda, fortalecendo o ecosistema cultural galego.
O ArtLab é un espazo do IGFAE orientado ao diálogo entre arte e ciencia, que busca impulsar a reflexión e o pensamento creativo. Proxectos como Cosmoloxías ou Instrumentos de visión xurdiron ao seu abeiro. O centro forma parte da rede CIGUS da Xunta de Galicia e conta coas acreditacións de excelencia María de Maeztu.
