A titulación da UVigo é a máis valorada de España e a segunda de Europa, segundo a entidade de referencia para a industria do deporte. O coordinador do mestrado, Patricio Sánchez, sinalou que estes resultados son "unha alegría e un recoñecemento ao traballo do grande equipo" e un respaldo ao labor realizado, destacando a competencia con grandes universidades europeas e americanas.
Sánchez subliñou que, tras 15 anos de existencia, o claustro de profesorado "non ten nada que envexar ao de calquera outro programa" e que, sumado a un alumnado "cada vez máis motivado", facilita os éxitos. Engadiu que estes recoñecementos "reafirma a nosa aposta pola internacionalización, a calidade e unha moi estreita conexión co tecido deportivo", lembrando as "excelentes perspectivas profesionais" no sector.
O responsable académico tamén apuntou que os postos acadados no ránking SportBusiness supoñen "unha responsabilidade que nos obriga a estar á altura do que se agarda de nós". Os resultados deste 2026 melloran os do ano pasado, cando o mestrado quedou primeiro en España, terceiro en Europa e 24º do mundo.
SportBusiness, unha asociación da industria do deporte, elabora ránkings para avaliar a formación de posgrao, considerando aspectos como a internacionalización, a calidade docente e a empregabilidade. O seu SportBusiness Postgraduate Rankings busca ser o sistema de clasificación máis confiable e respectado.
Este Mestrado en Xestión Empresarial do Deporte é o único programa oficial desta temática en Galicia. Inaugura este venres a súa 16ª edición, cubrindo de novo todas as prazas e destacando a súa boa acollida internacional, con alumnado procedente de diversos países.
