As probas darán comezo a partir das 18.00 horas coa carreira infantil e ás 20.00 coa contrarreloxo. Tanto o Concello como o club animan á cidadanía de todas as idades a sumarse a este evento para gozar dunha xornada de deporte e convivencia. As inscricións están abertas ata o día 9 de setembro ás 20:00 horas e realízanse a través de Cronotec.
A alcaldesa de Redondela, Digna Rivas, e o concelleiro de Deportes, Antonio Cabaleiro, presentaron esta cita deportiva que coincide co 14º aniversario do CAR. Por parte do club participaron a presidenta, Ana Romasanta, e os atletas Andrés Corugeira e Gael Couñago.
A Carreira Popular Infantil está dirixida a nenos e nenas nados entre 2011 e 2024, con distancias que van desde os 100 metros para os máis pequenos ata os 1.500 metros para os maiores. Tamén se celebrará unha Carreira Inclusiva, con categoría única, para persoas con diversidade funcional. As probas comezarán ás 18.00 horas na rúa Alfonso XII, coa meta situada fronte á Casa do Concello. A inscrición nestas carreiras é gratuíta e xa hai case un cento de participantes.
A Carreira Contrarreloxo por Equipos comezará ás 20.00 horas. Os equipos deberán estar formados por entre 4 e 6 compoñentes, sendo obrigatorio un mínimo de 2 do outro xénero nos equipos mixtos. O percorrido será de 5.000 metros, dende o centro da vila ata o Concello. A inscrición, que inclúe gastos de xestión, custa 8,50 euros, cun prezo reducido de 6,50 euros ata o venres 4 de setembro.
Establécense premios para os tres primeiros equipos clasificados en cada categoría. O primeiro equipo recibirá unha cesta de produtos gourmet galegos valorada en 150 € e 100 € en metálico. O segundo equipo obterá unha cesta de 100 € e un vale de 60 € para material deportivo, mentres que o terceiro clasificado levará unha cesta de 75 € e un vale de 40 €.
O evento conta co patrocinio de Rodavigo, Aqualia, Grupo Lirón, Decoraciones Barciela, Talleres Ponteseca, Edusportia e Grupo Damm.
