A listaxe co nome, día e hora do alumnado matriculado estará exposta na Escola Municipal de Música, así como na porta do Centro Cultural Municipal (Biblioteca Municipal) a partir do 1 de setembro de 2026.
A semana do 7 ao 11 de setembro será o período para escoller o horario de instrumento. Todo o alumnado matriculado no mesmo instrumento será citado á mesma hora para elixir o seu horario, seguindo a orde de matrícula realizada en xuño. Recoméndase levar anotadas diversas opcións de horarios para axilizar o proceso.
As novas matriculacións nas especialidades con prazas vacantes poderanse realizar entre o venres 11 e o mércores 30 de setembro.
A oferta da Escola Municipal de Música do Porriño inclúe Música e movemento para nenos e nenas desde os 4 anos, e Linguaxe musical para todas as idades. As especialidades instrumentais abarcan violín, viola, violonchelo, percusión, guitarra, piano, canto, gaita, clarinete, frauta traveseira, saxofón, óboe, fagot, trompa, trompeta, bombardino, trombón, tuba e percusión tradicional.
Ademais, a Escola conta con diversas agrupacións musicais como a Banda de música, a Mini banda do Porriño (Banda infantil), a Orquestra de corda, o Grupo de música tradicional, o Conxunto de guitarras, a Coral infantil e a Coral polifónica para adultos.
As clases do curso 2026/2027 comezarán o luns 14 de setembro, no edificio do Centro Cívico, situado na avenida Domingo Bueno, 13.
