A decisión de trasladar a pantalla xigante, que inicialmente estaba prevista para a praza do Concello, á rúa Domingo Bueno responde á previsión dunha elevada asistencia de público. O goberno local considera que a nova localización ofrece mellor visibilidade e capacidade, permitindo que máis de 1.000 persoas poidan seguir o encontro con comodidade.
O alcalde, Alejandro Lorenzo, sinalou que esta medida se basea no éxito da anterior semifinal, que congregou a máis de 700 persoas, e no interese veciñal. "Queremos que sexa unha festa, que todo o mundo estea cómodo para ver o partido e, oxalá, para celebrar a vitoria", destacou o rexedor.
O Concello organizou un programa de animación que inclúe festa da escuma, pintacaras e un DJ para ambientar o evento antes, durante e despois do partido. Para facilitar a instalación, o tramo central da rúa Domingo Bueno, entre a rotonda e a rúa Pío XII, permanecerá cortado ao tráfico desde as 18:30 horas.
Esta non é a primeira vez que a rúa acolle un evento futbolístico de gran magnitude; xa foi escenario da final da Eurocopa hai dous anos, que rematou cunha celebración multitudinaria. O Concello espera repetir ese ambiente festivo e manter a música nas rúas tras o encontro.
