A vila de O Porriño prepárase para acoller unha nova edición de Porrigalia, a festa que transforma o seu espírito para convertelo no epicentro duns singulares Xogos Olímpicos da antigüidade. Durante a fin de semana do 25 e 26 de xullo, as rúas da localidade mudarán o seu aspecto habitual para converterse nun escenario histórico onde convivirán e competirán galos, castrexos, romanos, exipcios e gregos.
Esta cita combina o rigor do deporte popular coa comedia e a recreación, animando á veciñanza e visitantes a gozar dunha fin de semana chea de música, gastronomía e espectáculos gratuítos. O alcalde, Alejandro Lorenzo, e o Concelleiro de Festas, Bienvenido Estévez, destacaron o carácter participativo da celebración e agradeceron a implicación de asociacións, ANPAS, comerciantes e hostaleiros.
A esencia de Porrigalia reside na recreación dunha gran comedia histórica. O sábado 25 ás 11:00 horas comezará co Gran Desfile desde San Sebastián ata a praza do Concello, onde o Rei Castrexo protagonizará o tradicional 'Destrone do Alcalde' nun acto cargado de humor. Tras este momento, acenderase a chama olímpica e haberá lectura do pregón oficial a cargo de Galidrone (Sergio e Daya).
A liña máis histórica concluirá o sábado ás 22:00 horas coa Gran Queimada na Praza Arquitecto Antonio Palacios, a cargo do Rei Panoramix, e o domingo pola noite coa devolución do poder na Entrega do bastón de mando e o desfile SubUmbra.
O motor da festa son as Probas Olímpicas, competicións onde as diferentes civilizacións miden forzas en probas de habilidade e resistencia física. Disputaranse o sábado ás 19:00 horas na Praza do Cristo, e o domingo a partir das 11:30 horas no mesmo emprazamento e na rúa Ramón Gonzalez. Repartiranse 500 cartóns olímpicos para selar as probas, e quen complete sete poderán acceder a unha consumición nalgúns locais colaboradores.
Para os máis pequenos, o domingo ás 18:00 horas a Praza 8 de Marzo acollerá o Gladiator Kids, unha proba de obstáculos. Tamén haberá obradoiros na Praza Antonio Palacios, pases de cetrería no Parque Templete, o show dos Bolechas o sábado e animación con pintacaras o domingo.
A música será un fío condutor coa participación de formacións como a Charanga Fanfarria Furruxa, a Batucada Os Miudos, Os Caliqueños, Cantos Somos, Os Vikingos e a Charanga Vai de Baile. As actuacións principais terán lugar no Parque Pio XII e na Praza Arquitecto Antonio Palacios. O sábado actuarán Kike Varela, Demasiadas Sombras y Pocas Luces e Toni Lomba (Pio XII), e Grande Amore e Traffic Hause (Arquitecto Antonio Palacios). O domingo haberá concertos de Gin Tonic’s, Pulpiño Trikisico e La Patrulla.
