O Concello de Redondela acometerá a renovación do firme das rúas José Regojo e dun tramo de 300 metros da rúa Pai Crespo. Estas actuacións, que supoñen renovar máis de 1.900 metros cadrados de pavimento, comezarán en breve e buscan solucionar o deterioro do asfalto, afectado por fisuras e fochancas.
As rúas afectadas son dúas arterias clave que cruzan a vila, conectando a Praza de Ponteareas coa Praza de Ribadavia. O tramo da rúa Pai Crespo comprende dende o número 88 ata o número 39, ademais de toda a rúa José Regojo.
“"Esta intervención era unha prioridade para o Goberno local, xa que falamos de dúas vías cunha alta densidade de tráfico tanto peonil como rodado. Mellorar o firme non só embelece o noso centro urbano, senón que garante a seguridade dos peóns e vehículos que empregan estas rúas a diario."
O concelleiro de Infraestruturas e Sostibilidade, Roberto Villar, destacou que o proxecto está deseñado para ser o máis eficiente posible. Para minimizar o impacto no tráfico, os traballos de pintado da sinalización realizaranse en horario nocturno, evitando así o gran tránsito de vehículos destas rúas durante o día. O prazo de execución é de dous meses.
Dende o Goberno local pídeselle comprensión á veciñanza polas posibles afeccións ao tráfico que se produzan durante as fases de fresado e asfaltado. A actuación foi adxudicada por 44.528,00 euros e finánciase con fondos propios do Concello, dentro dun plan de investimento en camiños municipais cun orzamento de 2,7 millóns de euros.
