O Concello do Porriño vén de sacar a licitación por 599.985,80 euros un gran proxecto de deporte urbano. Trátase dunha ambiciosa iniciativa para remodelar o Velódromo Municipal, inaugurado en 1993, e transformalo nunha área de deporte urbano punteira en Galicia. O novo espazo combinará un skatepark, un pumptrack de última xeración e zonas de descanso integradas paisaxisticamente.
Segundo explica o alcalde, esta construción responde "á demanda crecente da veciñanza, especialmente da xente moza, de espazos públicos de calidade para a práctica de disciplinas alternativas, e tamén unha aposta decidida polo turismo deportivo". O proxecto conta cunha subvención de 205.230,37 € da Deputación de Pontevedra e terá un prazo de execución de seis meses.
O novo complexo deportivo, cunha superficie de actuación de 2.774 m², deseñouse para garantir a evolución segura dos usuarios en modalidades como skate, bmx, scooter e roller. Construirase un Skatepark circular inspirado na nave "Falcón Milenario", con diferentes alturas e ramplas, integrando o granito rosa Porriño en elementos como quarters, hubbas e pirámides.
Ademais, disporá dun Pumptrack para todos os niveis, con dubbies, mesetas e peraltes pronunciados. O seu elemento máis espectacular será un "Wallride" de madeira con estrutura de aceiro nunha das curvas, situado na zona sur das instalacións. O trazado buscará a integración de todos os usuarios segundo a idade, modalidade e experiencia.
O proxecto tamén inclúe a mellora integral do edificio principal do Velódromo, corrixindo problemas de filtracións. Renovarase a fachada cun sistema suspendido de placas de policarbonato, repararanse os paramentos interiores e impermeabilizaranse as gradas, que serán cubertas cunha nova estrutura metálica e panel sándwich.
O deseño tamén contempla a creación de 185 m² de novas zonas verdes con exemplares arbóreos como o arce real e o carballo vermello, ademais de especies arbustivas. Tamén se habilitará unha zona de descanso central de 185 m² con bancos e fontes.
