O vindeiro venres, 17 de xullo, a localidade do Porriño converterase na capital do xadrez coa celebración do seu primeiro torneo oficial, o I Torneo Xadrez Concello do Porriño. O evento, organizado en colaboración co Club Xadrez Mos, dará comezo ás 19:30 horas na praza do Concello.
O torneo presenta dúas modalidades para adaptarse a todos os niveis. A Categoría A será un torneo oficial válido para Elo FIDE Blitz, dirixido aos xogadores máis experimentados que desexan mellorar a súa clasificación internacional. Pola súa banda, a Categoría B está pensada para os afeccionados e familias, brindando unha oportunidade única para que aqueles que acompañan habitualmente aos xogadores poidan tamén participar.
“"É unha oportunidade xenial para os familiares que son afeccionados ao xadrez e que se pasan todo o ano acompañando aos nenos e nenas de torneo en torneo sen ter nunca a oportunidade de xogar."
O alcalde do Porriño destacou a importancia destas iniciativas para o municipio, subliñando que "eventos como este non só dan visibilidade ao xadrez, que destaca como ferramenta educativa e social, senón que tamén fomentan valores como a concentración, a toma de decisións e o respecto polo adversario".
O goberno local reafirmou o seu compromiso co apoio ao deporte, lembrando unha exhibición de partida simultánea realizada hai un ano na praza Arquitecto Antonio Palacios. O rexedor animou a todos os veciños a participar e gozar dunha xornada diferente que combina deporte, educación e participación cidadá.
A competición desenvolverase con partidas ás 19:30, 20:00, 20:30, 21:00, 21:30, 22:00 e 22:30 horas. O acto de clausura está previsto para as 23:00 h. As bases completas e información de inscrición están dispoñibles na páxina web do concello e a través do teléfono 618 873 541 e o correo electrónico clubxadrezmos@gmail.com.
