A vicepresidenta da Deputación de Pontevedra, Luisa Sánchez, destacou a mellora na accesibilidade urbana que supón o novo ascensor da rúa Juan Ramón Jiménez, en Vigo. A obra, que conecta as rúas Marqués de Valterra e Conde de Torrecedeira, está lista para abrirse ao público nos próximos días tras superar as probas pertinentes e á espera do visto e prace de Industria.
Este elemento de mobilidade mecánica salva un desnivel de once metros, facilitando o tránsito peonil entre as zonas baixas e altas da cidade e permitindo o enlace co elevador xa existente cara a Pi y Margall. A vicepresidenta aproveitou para convidar ao goberno local a reforzar o mantemento destes equipamentos.
A actuación incluíu a remodelación integral da contorna, coa renovación de beirarrúas, a instalación dunha nova rede de pluviais e rega, a mellora da iluminación, novo mobiliario urbano e a plantación de árbores. Na parte superior instalouse unha escultura en homenaxe ao poeta Juan Ramón Jiménez.
Luisa Sánchez reiterou o compromiso da Deputación coa transformación urbana, lembrando que a institución provincial financiou o 66% do orzamento (760.000 euros), mentres que o Concello de Vigo achegou o restante ata os 1,15 millóns.
Estes fondos proceden de 6,2 millóns de euros rescatados pola Deputación, que se destinaron a tres proxectos de mellora urbana en Vigo: este ascensor, as ramplas de Pintor Colmeiro e a humanización da rúa San Roque.
A vicepresidenta recalcou que a Deputación de Pontevedra é "decisiva na transformación da cidade" e sinalou que este é o sexto investimento completado neste mandato, tras actuacións en Estrada Clara Campoamor, Pavillón das Travesas, Parque Nelson Mandela, Campo das Relfas e rúa Pintor Colmeiro.
Ademais, lembrou outros proxectos en marcha como a reconstrución da grada de Gol de Balaídos, a recuperación do Teatro Cine Fraga, a reforma da piscina de Teis e a creación dun gran parque de xogos en Finca Matías.
