A mostra, titulada Laxeiro, as viñetas que non foron ao prelo, presenta seis pezas de tinta sobre papel que retratan a un Laxeiro primitivo, na súa etapa de busca de linguaxe artística. Estas obras, creadas a finais dos anos 20 e principios dos 30, son un reflexo dos seus primeiros pasos como creador.
A exposición xurdiu a raíz da doazón da peza O Enterro, que o director artístico da Fundación, Xavier Buján, cualificou de especial pola súa conexión coa produción posterior do artista, a pesar de ser unha obra temperá na que aínda asinaba como José Otero. Esta peza serviu de referencia para localizar outros debuxos do mesmo período nos fondos da Fundación, como O velatorio, que comparten estética e temática.
Buján sinalou que o obxectivo é mostrar un Laxeiro "primitivo e radical". A selección complétase con catro obras máis do mesmo período: unha parella de namorados, unha maternidade, unha romaría e unha escena de mercado, que presentan ao artista como un pintor vinculado ás vivencias populares e ás distintas etapas da humanidade.
A presentación oficial contou coa presenza do alcalde Abel Caballero e os concelleiros Carmela Silva e Gorka Gómez. Tamén asistiron o neto do artista, Carlos García-Suárez Otero, director xeral da Fundación, e a súa bisneta, Paula García-Suárez, vicepresidenta. O alcalde destacou a importancia da mostra, cualificando a Laxeiro como "un artista internacional" e asegurando o compromiso do Concello para promover a súa obra fóra das fronteiras.
A exposición, que se atopa nunha das paredes da sala que estrea iluminación, permanecerá aberta ao público ata o vindeiro 20 de setembro.
