A convocatoria, que se mantén aberta ata o vindeiro 25 de setembro, permite a incorporación de novos intérpretes á orquestra, que xa conta cuns trinta membros procedentes dos campus de Vigo, Ourense e Pontevedra.
As persoas interesadas deben completar un formulario en liña onde detallarán o instrumento ou instrumentos que tocan, a súa formación musical e a experiencia previa. A orquestra dispón de instrumentos de corda (violíns, violas, violonchelos e contrabaixos), vento madeira e vento metal, e está previsto incorporar percusión proximamente.
Os ensaios terán lugar os xoves, de 19:00 a 21:00 horas, no edificio Redeiras. De forma excepcional, poderán incorporarse colaboradores externos cando as necesidades artísticas da orquestra o requiran.
Impulsada pola Área de Cultura da Vicerreitoría de Estudantes e Vida Universitaria, a orquestra naceu hai menos dun ano co obxectivo de ser un espazo artístico participativo e enriquecedor. A formación xa realizou concertos en Vigo e Ourense, e agárdase que poida estrearse en Pontevedra nos próximos meses.
O debut tivo lugar en xuño no auditorio do Conservatorio Superior de Música de Vigo, cun repertorio que incluíu obras de Haydn, Mozart, Bartók e Rossini, ante un auditorio case cheo. Posteriormente, a orquestra actuou no Teatro Principal de Ourense.
