O proxecto Iberos+, coordinado pola Universidade de Vigo, rematou catro anos de investigación transfronteiriza en biofabricación e medicina personalizada para o envellecemento saudable. A xuntanza final, celebrada en Vigo, presentou os resultados acadados polo consorcio, integrado por universidades, centros de investigación, empresas e administracións de saúde de Galicia e Portugal. O proxecto contou cun orzamento de preto de 2,2 millóns de euros, financiado polo Programa Interreg España-Portugal 2021-2027 (Poctep).
A xornada destacou os avances derivados da I+D colaborativa, que se materializaron en publicacións conxuntas, proxectos e rexistros de patentes. Presentáronse novas matrices para a rexeneración de tecidos, terapias inxectables para patoloxías articulares e biosensores para enfermidades asociadas á idade. Tamén se expuxeron plataformas tridimensionais mariñas para a rexeneración articular e hidroxeles específicos para biofabricación.
A transferencia de coñecemento centrouse en casos como a Plataforma de Impresión 3D no Hospital Álvaro Cunqueiro, que busca desenvolver tecidos e órganos adaptados a cada paciente, e os novos scaffolds reabsorbibles para favorecer o crecemento e rexeneración de tecidos, presentados por Beta Implants.
A divulgación e formación tamén foron eixos clave, coa presentación dos resultados da Bioimpresión 3D Summer School e o dobre Máster en Biofabricación e Enxeñaría Biomédica. Impulsouse tamén o Libro Branco da Biofabricación para analizar a situación actual do sector e as súas perspectivas futuras.
A xuntanza tamén serviu para valorar o alcance da colaboración establecida entre as entidades da eurorrexión e analizar as oportunidades para seguir impulsando iniciativas conxuntas nun ámbito estratéxico para a saúde.
