O pasado venres rematou o prazo de presentación de candidaturas para as eleccións ao decanato da Facultade de Filoloxía e Tradución da Universidade de Vigo, sen que se materializase ningunha proposta formal. A actual xunta directiva, liderada polo decano José Montero Reguera, continuará en funcións tras dous mandatos consecutivos e catro meses exercendo o cargo provisionalmente.
Aínda que durante o proceso electoral, que se iniciou coa exposición pública dos censos o pasado 22 de xuño, xurdiu unha proposta para a candidatura ao decanato, esta finalmente non se concretou. Ante a ausencia de aspirantes, a reitora da UVigo, Carmen García Mateo, resolverá a continuidade en funcións do anterior titular, segundo o regulamento electoral xeral. Montero Reguera deberá convocar novas eleccións nun prazo máximo de seis meses.
No caso de que o actual decano non puidese continuar en funcións por circunstancias excepcionais, a reitora nomearía provisionalmente á catedrática ou catedrático máis antigo do centro, ou na súa falta, á profesora ou profesor titular ou doutor con vinculación permanente de maior antigüidade na facultade.
José Montero Reguera, catedrático do Departamento de Literatura Española e Teoría da Literatura, foi elixido decano por primeira vez en abril de 2020 e reelixido en abril de 2023 por maioría absoluta. O seu equipo directivo incluía a Miguel Cuevas (secretario e responsable de Infraestruturas), Inmaculada Anaya (vicedecana de Comunicación, Captación e Diversidade), Beatriz Rodríguez (vicedecana de Relacións Internacionais), María Seijas (vicedecana de Calidade) e Xosé Soto (vicedecano de Organización Académica).
Montero Reguera xa ocupara o cargo de decano da Facultade de Filoloxía e Tradución noutras dúas ocasións antes dos seus dous mandatos consecutivos.
