O programa ‘Lab Xove’, desenvolvido ao longo de todo o mes de xullo en Redondela, foi cualificado polo Concello como un éxito, cunha participación e valoración excelentes por parte das persoas asistentes. A iniciativa, dirixida a mozas e mozos maiores de 12 anos, tivo como obxectivo ofrecer un espazo de encontro, aprendizaxe e ocio seguro durante as vacacións de verán.
As actividades, que se celebraron en horario de mañá, espertaron un grande interese entre a rapazada. A alcaldesa, Digna Rivas, mostrou a súa satisfacción polo desenvolvemento do programa, sinalando que “o éxito destas xornadas demostra que a mocidade do noso Concello ten inquedanzas e ganas de aprender cando se lle ofrecen alternativas públicas de calidade, saudables e adaptadas aos seus gustos”. A rexedora animou á mocidade a propoñer novas ideas para futuros obradoiros.
As novidades deste ano foron unha peza clave no éxito do programa. A concelleira de Infancia e Xuventude, Iria Vilaboa, destacou a excelente acollida do obradoiro de Artesanía en coiro e do de Iniciación a DJ, confirmando o acerto de introducir novos formatos creativos e musicais.
A axenda do ‘Lab Xove’ completouse con formación técnica en Edición de vídeo e foto, innovación tecnolóxica con Ferramentas de IA e expresión artística con Pintura mural. A concelleira Vilaboa subliñou o bo ambiente e o grao de implicación, afirmando que a resposta recibida “impúlsanos a seguir traballando dende a Concellería en novas propostas formativas, artísticas e dixitais”.
