A solidariedade cruza miles de quilómetros grazas á iniciativa do CEIP Valle-Inclán, que busca converter Vigo nunha gran onda de apoio para que os nenos e nenas dos campamentos saharauís poidan seguir desenvolvendo os seus soños.

A proposta naceu da experiencia dun docente do centro, quen viaxou ao Sahara Occidental e coñeceu de preto a realidade dos menores nos campamentos de refuxiados. Esta vivencia deu lugar a un intercambio de cartas entre o alumnado vigués e os nenos saharauís, facilitado pola colaboración de Solidariedade Galega de Axuda ao Pobo Saharauí (SOGAPS).

As cartas revelaron que os soños dos nenos saharauís son semellantes aos dos escolares de Vigo: aprender, xogar e imaxinar o futuro. Mentres que aquí o material escolar é habitual, alí pode ser un recurso escaso.

Baixo o lema “Unha marea de cadernos: Os nenos e nenas de Vigo cos soños do Sahara”, a iniciativa busca transformar a solidariedade en axuda tangible. O vindeiro 24 de maio, o Parque de Castrelos acollerá unha carreira solidaria onde a inscrición será a doazón de material escolar como cadernos, lapis ou gomas.

O centro educativo fai un chamamento a que máis escolas se sumen á acción, actuando como puntos de recollida, participando na carreira ou difundindo a iniciativa para ampliar esta 'marea solidaria'.