A acumulación de residuos nos sistemas de escape, coñecida como fouling, reduce a eficiencia dos equipos de combustión, incrementa o mantemento e dificulta o seu funcionamento. Minimizar este fenómeno é un reto clave na enxeñaría enerxética actual.
Neste contexto, Saúl Díaz Rodríguez, baixo a dirección de Eduardo Suárez Porto e Miguel Concheiro Castiñeira, desenvolveu no CINTECX da Universidade de Vigo unha tese doctoral que analiza o uso do ozono como axente oxidante para combater estes depósitos. A investigación enmárcase no programa de doutoramento en Eficiencia Enerxética e Sustentabilidade en Enxeñaría e Arquitectura.
O estudo céntrase na redución dos depósitos xerados polos gases de escape en sistemas de combustión, un campo con escasos estudos experimentais pero cun gran potencial para mellorar a eficiencia enerxética e os custos operativos.
Un dos principais desafíos foi comprender a interacción do ozono cos depósitos. Para iso, deseñouse e validouse un novo banco de ensaios específico que permitiu analizar variables como a concentración de ozono, a temperatura, o caudal e o tempo de exposición.
Os resultados permitiron desenvolver un modelo para describir a reacción entre o ozono e os depósitos de fouling, identificando as condicións óptimas para maximizar a súa eficacia. Posteriormente, o estudo simulou condicións reais de funcionamento, inxectando ozono durante a formación dos depósitos.
Os ensaios incluíron hidrocarburos característicos dos gases de escape de motores de combustión interna, reproducindo situacións industriais complexas onde o ozono mantivo a súa capacidade de actuación.
A investigación constatou melloras na eficiencia térmica, redución de hidrocarburos nos gases e modificacións significativas nas características dos depósitos. Conclúese que o ozono é unha alternativa prometedora para combater a acumulación de depósitos nos sistemas de escape.
