A Deputación de Pontevedra vai financiar máis do 80% das obras de mellora e restauración da Fonte do Rial e outros seis lavadoiros municipais en Nigrán. A Xunta de Goberno do organismo provincial aprobará este venres unha achega de case 250.000 euros para sufragar esta actuación, enmarcada no Plan +Provincia 2026-2027.
O proxecto céntrase na conservación, restauración e recuperación da Fonte do Rial, na parroquia de Camos, e dos seis lavadoiros públicos: Rans (San Pedro), Cabreira (San Pedro), Carballal (Camos), Mina Camos (Camos), O Torreiro Nandín (Parada) e Pracins de Abaixo (Chandebrito). A intervención inclúe a limpeza, a restauración dos muros de granito e a instalación de novas cubertas.
Ademais, rexenerarase a contorna pública destes elementos, con novos pavimentos, iluminación e zonas verdes. O deputado provincial Jesús Vázquez Almuiña destacou que estes recursos dan resposta ás demandas dos concellos e melloran a calidade de vida da veciñanza, recuperando o patrimonio.
