A circulación na autoestrada AP-9 á altura do quilómetro 164, en Mos, aínda non recuperou a normalidade. O carril dereito permanece pechado debido ao envorco dun camión ocorrido este sábado, que derramou parte dos 32.000 litros de gasóleo que transportaba. Aínda que xa se pode circular polo carril esquerdo, as autoridades recomendan precaución.

Ademais das restricións de tráfico, as autoridades competentes solicitaron aos veciños das inmediacións da área afectada que non consuman auga de pozos particulares nin a empreguen para regadíos, como medida preventiva ata que se dispoña dos resultados das análises.

A situación foi avaliada esta mañá nunha xunta técnica celebrada no Concello de Mos, coa participación de representantes municipais, da Consellería de Sanidade, da Axencia Galega de Emerxencias (Axega) e da Confederación Hidrográfica Miño-Sil (CHMS).

A CHMS será a encargada de realizar un seguimento continuo da zona mediante analíticas e controis periódicos. A recollida de mostras comezou este domingo, e equipos especializados traballan na renovación dos elementos de contención para protexer o regato da Salgueira e o resto do contorno.

Para as vivendas máis próximas á 'zona cero', aproximadamente unha ducia de inmobles ao redor do regato, mantense a recomendación preventiva de non usar auga de pozos nin regadíos ata ter os resultados das análises.

Segundo explicou o Concello, os técnicos sinalaron na reunión que esta medida responde a un "criterio de prudencia" mentres se avalía o alcance da afección e se completan as mostras nas captacións da zona.