O Hospital Cunqueiro de Vigo converteuse no escenario de proba para unha nova tecnoloxía desenvolvida polo Grupo de Tecnoloxía Enerxética do Cintecx da Universidade de Vigo. O obxectivo é monitorizar a calidade do aire interior en tempo real e deseñar sistemas que melloren a xestión dos edificios e o confort das persoas.

Os resultados iniciais do proxecto piloto confirman o bo funcionamento do sistema nun contorno esixente, reforzando o papel do centro hospitalario como referente en innovación. O proxecto, financiado pola Xunta con 390.000 euros e realizado en colaboración coa área sanitaria de Vigo, a concesionaria do hospital e Veolia, busca transformar datos ambientais en información útil.

A experiencia tivo lugar na sala de espera das consultas externas, onde se instalaron preto de 40 dispositivos. Estes aparatos recolleron datos cada cinco minutos en máis de 80 puntos de control, ofrecendo unha imaxe precisa do comportamento ambiental do espazo.

Os datos recompilados ata abril mostran parámetros estables e acordes cos estándares dun hospital de vangarda. As temperaturas medias oscilaron entre os 23,5 °C en xaneiro e os 24,0 °C en xullo, mentres que a humidade relativa situouse entre o 46,9% e o 60,9%. Os niveis medios de dióxido de carbono mantivéronse en 618 ppm no inverno e 630 ppm no verán, indicando unha ventilación e calidade do aire óptimas. O sistema tamén identificou oportunidades para optimizar a homoxeneidade térmica e o control da humidade.