A rede provincial, con sedes na Fonsagrada, Mondoñedo, Friol, Monforte de Lemos e Sarria, ofrece asesoramento individualizado e gratuíto para iniciar ou consolidar negocios. Dende a súa posta en marcha, o persoal técnico realizou máis de 4.900 titorías, tanto presenciais como en liña.
O perfil das persoas emprendedoras destaca pola importante presenza feminina, xa que máis da metade dos proxectos asesorados están impulsados por mulleres. Por sectores, a hostalaría concentra o 20% das iniciativas, seguida do comercio (16%) e dos servizos (13%).
A Rede tamén aborda a remuda empresarial, representando o 6% dos proxectos atendidos en Lugo. A través deste servizo, facilítase o contacto entre propietarios de negocios que desexan vender ou alugar a súa actividade e potenciais emprendedores interesados en asumir a xestión, asegurando a continuidade de empresas viables.
Ademais do asesoramento individual, os cinco polos lugueses organizaron máis de 820 actividades, incluíndo encontros, accións formativas e eventos para impulsar o emprendemento e a colaboración local.
A Rede de polos forma parte da aposta estratéxica do Goberno galego polo apoio á innovación e á vertebración do territorio. Actualmente, conta con 15 oficinas activas en toda Galicia, que dende o seu inicio atenderon máis de 7.100 iniciativas a nivel autonómico, con máis de 22.300 titorías e 2.800 actividades realizadas.
