A décimo terceira edición do Pont-Up Store, o encontro do emprendemento promovido pola Universidade de Vigo e organizado pola Asociación para a Innovación e o Emprendemento Pont-Up Store, contará coa participación de 48 novas iniciativas empresariais. O evento, que se celebrará en Pontevedra os días 11 e 12 de setembro, converterá a cidade nun escaparate do talento emprendedor galego, co apoio do Concello de Pontevedra, a Deputación de Pontevedra, a Xunta de Galicia, Zona Franca e Abanca, entre outras entidades.
Estas empresas, con menos de tres anos e medio de traxectoria, céntranse en ámbitos como a biotecnoloxía, a intelixencia artificial, a economía circular, a cultura ou a innovación agrícola. Destaca que o 69% das propostas están lideradas por mulleres e o 47% proceden de pequenas vilas e concellos rurais. Sete empresas desenvolverán actividades demostrativas e oito participarán no Pont-Up Venture para presentar os seus proxectos a profesionais do investimento e o venture capital.
A pesar dun contexto marcado polo descenso na creación de empresas en Galicia, o encontro recibiu un número similar de candidaturas aos anos anteriores. Pedro Figueroa, director do Pont-Up Store, sinalou que se observa unha evolución cara proxectos máis maduros, innovadores e con maior base tecnolóxica, con empresas con capacidade real para medrar e internacionalizarse.
Nesta edición, incrementouse a presenza de proxectos tecnolóxicos e spin-off universitarias, como edgeContinuum (infraestruturas cloud descentralizadas) ou Enerxía Comunitaria (transición enerxética) da UVigo. Tamén gañan peso iniciativas ligadas á intelixencia artificial (Sizit AI, Numacoach, Workstamp, loveIFC) e á sustentabilidade (Aurarte, Plic (re)made, Forest, DodoMadeira, BioAqua).
O evento tamén busca visibilizar o emprendemento do rural e pequenas vilas con propostas como Treba Gourmet, Caldeira Cerámica, Floresta Flores, Fermentos da Meiga ou Labre Gando. Ademais, terán presenza destacada as industrias culturais e creativas, con iniciativas como a cooperativa audiovisual A Furna, Enxame Drones, Círculo de Bordadoras e o artista Ismaelo.
A organización destaca que o 69% das iniciativas son lideradas por mulleres, unha porcentaxe superior á media do ecosistema emprendedor. Non obstante, esta presenza diminúe nos proxectos de maior intensidade tecnolóxica e escalabilidade, onde as mulleres seguen sendo minoría á fronte dos proxectos, un desafío que Figueroa sinala como clave para incrementar a súa presenza nos proxectos científicos e tecnolóxicos de maior impacto.
