A localidade de Verín será o escenario o vindeiro domingo 20 de setembro dunha nova proposta do programa Andainas Xeodestino 2026. Trátase da Ruta da Auga, un percorrido circular deseñado para que os participantes descubran a pé diferentes espazos vencellados á auga, ao patrimonio termal e á contorna natural do municipio.
A andaina dará comezo ás 09:00 horas dende a Praza do Concello de Verín. O itinerario terá unha lonxitude aproximada de 16 quilómetros, cunha dificultade media, un desnivel acumulado de 100 metros e unha duración estimada de catro horas.
Durante o percorrido, os asistentes poderán coñecer puntos de interese como a Fonte de Cabreiroá, a Ermida de San Antón, a Fonte do Sapo, o Balneario de Caldeliñas, a praia fluvial da Pousa e o sendeiro do río Támega.
Esta iniciativa busca combinar a actividade física coa natureza e o patrimonio, destacando a histórica relación de Verín coa auga mineral e o termalismo, así como cos mananciais e espazos naturais que definen a súa identidade e paisaxe.
A actividade forma parte do programa Andainas Xeodestino 2026, impulsado polo Xeodestino Verín-Monterrei co obxectivo de promover o coñecemento e a posta en valor dos recursos do territorio, tanto para a veciñanza como para os visitantes.
As persoas interesadas en participar deben inscribirse a través de Celtia Travel. Para máis información, poden contactar nos teléfonos 635 482 477 e 629 858 134.
