O titular da carteira sanitaria da Xunta detallou que a hospitalización a domicilio comezará a prestarse o vindeiro día 17 de setembro, mentres que as consultas de pneumoloxía tamén se porán en marcha este mes. A actividade de consultas de cardioloxía iniciouse xa este 10 de setembro.
Estas medidas demostran, segundo palabras do conselleiro, que o Goberno galego continúa a reforzar a capacidade asistencial deste hospital comarcal da rede do Servizo Galego de Saúde (Sergas).
Gómez Caamaño explicou que, desde 2024, o cadro de persoal do hospital incrementouse preto dun 13 %, creáronse 35 postos de traballo e o centro conta hoxe con 350 profesionais. Ademais, entre 2024 e 2025 incorporáronse 15 especialistas, o que supón un aumento do 37,5 %.
Destacou que case o 67 % da plantilla ten praza en propiedade e que tres de cada catro profesionais do hospital contan cun posto estable. A medicina interna está plenamente cuberta con oito especialistas con praza en propiedade, e só restan por cubrir unha praza de neuroloxía e outra de oftalmoloxía, especialidades deficitarias a nivel nacional.
O conselleiro tamén puxo en valor que no Hospital de Verín as demoras para unha intervención cirúrxica son 56 días menores que a media estatal, e para unha consulta especializada son 41 días menos. Especialidades como dixestivo e oncoloxía presentan demoras inferiores aos 20 días.
En canto a investimentos, a Xunta puxo en marcha a nova área de urxencias e PAC cun investimento de case cinco millóns de euros, instalou dous ecógrafos e comprou unha nova torre de anestesioloxía. Tamén se incorporou un sistema automatizado para a xestión da dispensación de medicamentos.
Gómez Caamaño reiterou o compromiso da Xunta co centro, traballando para consolidar un hospital resolutivo cunha atención de calidade, próxima, coordinada e equitativa.
