Durante a sesión, formalizouse a entrada de catro novos representantes na corporación municipal. Tras este trámite, procedeuse á constitución do grupo municipal correspondente e á designación das súas portavocías e adscricións ás comisións informativas.
No ámbito económico, o Pleno aprobou un expediente de recoñecemento extraxudicial de créditos por un importe de 502.150,62 euros. Esta medida enmárcase no proceso de regularización de obrigas pendentes que o consistorio está a levar a cabo este ano.
En canto á axenda cultural, ratificouse o convenio de colaboración coa Asociación Cultural Audiovisual Vía XIV para a organización do FIC Verín Vía XIV 2026. A achega municipal para esta décima edición do certame cinematográfico ascende a 40.000 euros.
Finalmente, modificáronse as bases do orzamento municipal para reaxustar as subvencións deportivas. Os 3.000 euros inicialmente consignados para dous clubs ciclistas, que non poderán desenvolver as súas actividades este ano debido ao estado dos montes tras os incendios, destinaranse agora á Escola de Danza Diversity e ao Club Val do Támega.
