O produto “Chivi-Fire”, un líquido experimental e ecolóxico elaborado con materiais biodegradables e económicos, está a xerar un notable interese. Tras ser recoñecido co primeiro premio no IV Festival Científico CinVigo, agora o Concello de Verín decidiu apostar por esta innovación, froito do traballo de cinco alumnas de 1º de Bacharelato do Club de Ciencia do instituto Xesús Taboada Chivite.
O plan municipal, que prevé equipar dispositivos de observación aérea con este líquido, foi unha sorpresa para as estudantes. A iniciativa busca aproveitar a eficacia do retardante, que demostrou ser máis rápido e eficiente que a auga na sofocación de chamas, para combater os focos de incendios. Este invento escolar pasará así da aula á aplicación práctica, formando parte dun sistema integral de vixilancia e intervención temperá que tamén incluirá globos cativos.
“"A idea xurdiu durante unha entrevista con Cristóbal Medeiros, da BRIF Laza, no marco do seu proxecto para este curso, “Incendios forestais: antes, durante e despois do lume”."
Unha vez localizado o lume, entrarían en acción medios non tripulados equipados con depósitos de “Chivi-Fire”. Isto permitiría conter a propagación inicial das chamas e gañar un tempo crucial ata a chegada dos servizos de extinción convencionais. As probas realizadas polas alumnas demostraron que o material tratado con este líquido resiste o calor intenso sen arder ou atrasa significativamente a aparición das chamas en comparación con mostras non protexidas.
Ademais do “Chivi-Fire”, as estudantes tamén desenvolveron unha aplicación móbil para priorizar os desbroces no monte e as “Chivi-Seeds”, biocápsulas con sementes destinadas á reforestación de terreos queimados. O seu profesor, Pablo Blanco, expresou o seu orgullo polo traballo das súas alumnas, subliñando a importancia de actuar con prudencia mentres buscan as mellores formas de aplicar os seus inventos.
