O informe de Meteogalicia sinala que este período, comprendido entre marzo e maio, rexistrou unha media de 160 litros por metro cadrado, cualificándose como un período “moi seco” e sendo a cuarta primavera máis seca dende que existen rexistros.

As maiores cantidades de chuvia concentráronse na franxa atlántica, Serras Litorais e zonas montañosas do leste, con valores entre 225 e 260 litros/m². Pola contra, as rexistros máis baixos localizáronse en Valdeorras, o interior de Lugo e o Golfo Ártabro, con cifras entre 115 e 130 litros/m².

Marzo e abril foron meses “moi secos” ao acumular precipitacións por baixo do esperado. Maio, en cambio, considerouse un mes normal, xa que os excesos de chuvias por treboadas na metade leste compensáronse co déficit noutras zonas onde as frontes foron menos activas.

En canto ás temperaturas, a primavera de 2026 foi “moi cálida”, cunha media de 13,7 graos, o que representa unha anomalía de 1,4 graos respecto ao habitual. Os tres meses rexistraron valores superiores ao agardado.

Marzo e abril presentaron temperaturas máximas e mínimas elevadas debido a situacións anticiclónicas e á chegada de aire cálido do norte de África. Maio estivo marcado por unha primeira parte con valores baixos, seguida dun ascenso térmico significativo a partir do día 20 debido a unha masa de aire cálido continental.