As escavacións realizadas no xacemento do Castelo de Valencia do Sil durante a campaña de 2026 permitiron documentar novos descubrimentos de gran relevancia para a historia de Valdeorras e do noroeste peninsular durante a época tardorromana. Os resultados preliminares confirman o gran potencial arqueolóxico do asentamento.
Entre os avances máis destacados atópase a localización de novas estancias habitacionais dentro do complexo residencial xa identificado en campañas anteriores. Ademais, recuperouse unha cantidade significativa de materiais cerámicos e metálicos datados nos séculos IV e V despois de Cristo.
Un dos achados máis singulares, tras os traballos de laboratorio, foi a recuperación de restos óseos dun individuo infantil. Estes restos foron atopados en relación con niveis de nivelación das estruturas e poderían estar vinculados a unha das primeiras fases de ocupación do xacemento.
“"Atopar un individuo infantil nestes contextos resulta relativamente estraño para as cronoloxías que manexamos do final do Imperio romano."
A directora da escavación, Celtia Rodríguez González, sinalou que este tipo de prácticas son máis coñecidas en sociedades prehistóricas, protohistóricas e en contextos do cambio de Era, como se documentou noutros xacementos galegos como A Lanzada (Sanxenxo), onde se identificaron individuos infantís do século I d.C. nun espazo de patio.
“"Aínda que é todavía moi cedo para aproximar a hipótese, probablemente pertenza a esa primeira fase de ocupación do xacemento, moi vinculado cos Xigurros de Valdeorras. De ser así, estaríamos ante o primeiro corpo dun Xigurro de Valdeorras."
Carlos Tejerizo, codirector dos traballos, engadiu que, aínda que é cedo para confirmar, a estratigrafía suxire que este achado podería estar vinculado á primeira fase do asentamento e aos Xigurros de Valdeorras, o que suporía o primeiro corpo desta cultura documentado na zona.
