A escaseza de man de obra cualificada e a necesidade de crear oportunidades laborais que axuden a reter talento e fixar poboación impulsan a posta en marcha de novas iniciativas formativas adaptadas ás necesidades reais das empresas. Neste contexto, Cupa Group impulsa, xunto á Consellería de Educación da Xunta de Galicia, dous novos programas de Formación Profesional Dual que comezarán o próximo curso nos centros educativos de Trives e Sobradelo, fortalecendo así a conexión entre a formación e o mundo empresarial.
No IES Xermán Ancochea Quevedo de Trives implantarase o ciclo de FP Dual Intensiva de Grao Superior en Sistemas Eletrotécnicos e Automatizados. Esta formación está directamente ligada ao plan de modernización dos centros produtivos de Cupa Pizarras, onde a introdución de novas tecnoloxías e solucións automatizadas está a mellorar a eficiencia operativa, o aproveitamento do recurso, a seguridade dos traballadores e a calidade do emprego, especialmente nas súas naves de elaboración. Esta transformación está a incrementar a demanda de perfís especializados en electricidade, electrónica e mantemento industrial, competencias clave para acompañar a evolución tecnolóxica da empresa nos próximos anos.
Pola súa banda, o IES Sobradelo-Carballeda impartirá un Certificado Profesional en extracción e elaboración de pedra natural, cunha dobre convocatoria ao longo do curso: a primeira en setembro e a segunda en febreiro. A formación está orientada a perfís operativos de alta demanda por parte de Cupa Pizarras para desenvolver a súa actividade nos procesos de extracción, serrado, labrado, selección e embalaxe do material. O programa combina a formación no centro educativo con prácticas na empresa, facilitando unha incorporación directa ao mercado laboral e unha capacitación axustada ás necesidades actuais do sector.
Estas iniciativas forman parte da estratexia de colaboración entre Cupa Group e o ámbito educativo para achegar as súas actividades industriais e de xestión aos centros formativos e mellorar a empregabilidade dos alumnos. Nos últimos meses, esta liña de traballo concretouse en accións de orientación e divulgación en centros como o IES de Trives e o Lauro Olmo do Barco, onde o equipo da compañía compartiu co alumnado experiencias do día a día, casos prácticos relacionados cos contidos dos ciclos formativos e pautas básicas para a súa incorporación ao mercado laboral.
Cupa Group emprega actualmente a máis de dous mil persoas en comarcas como Valdeorras, O Courel, El Bierzo, A Cabrera e Aliste, zonas periféricas de Galicia e Castela e León en proceso de despoboamento. A compañía mantén unha aposta sostida polo emprego estable e a cualificación: en 2025, o 98% dos seus contratos foron a tempo completo, o 93% indefinidos e dedicou máis de 32.000 horas á formación dos seus traballadores. Os novos programas que impulsa en Trives e Valdeorras son un elemento clave para responder ás necesidades do tecido empresarial, facilitar o acceso a oportunidades profesionais de calidade e favorecer a substitución xeracional no territorio.
