A Plataforma SOS Sanidade Pública Costa da Morte manifestouse fronte ao centro de saúde de Baio, en Zas, para expresar o seu rexeitamento ao que consideran un "proceso de desmantelamento" da Atención Primaria na rexión. Segundo o colectivo, a carencia de profesionais é "alarmante", afectando de xeito crítico á pediatría, o que obriga aos nenos a desprazarse fóra do seu municipio para recibir atención médica.
Ademais da falta de especialistas, a plataforma subliña que as listas de agarda para unha consulta médica superan os quince días, impedindo unha atención axeitada e a tempo. No caso específico de centros como o de Zas, a situación agrávase pola existencia de prazas médicas sen cubrir, o que provoca unha sobrecarga no único profesional dispoñible.
“"Como pode o PP dicir que o servizo se presta con normalidade, se hoxe mesmo no centro médico de Baio daban cita para dentro de dúas semanas? É un escandalo, e ademais minten sen avergonzarse."
A denuncia da plataforma tamén se estende ao Hospital Virxe da Xunqueira, onde servizos como Hospitalización a domicilio ou Psiquiatría son considerados "totalmente insuficientes". Ante esta situación, esixen un incremento dos recursos destinados á Atención Primaria, ata acadar o 25% do orzamento sanitario, e que se garanta a accesibilidade e a continuidade asistencial mediante a contratación de máis profesionais.
A concentración contou co apoio do BNG de Costa da Morte, que arroupou a medio cento de persoas. O deputado nacionalista Oscar Insua criticou a postura do Partido Popular, cuestionando a súa afirmación de que o servizo se presta con normalidade cando as citas se demoran ata dúas semanas.
