A sesión cinematográfica comezará ás 21:00 horas e achegará ao público unha obra que pon o foco no territorio e nas persoas que o habitan, a través dunha ollada sobre unha realidade concreta e as súas diferentes dimensións.
‘360 Curvas’ chega ao ciclo avalado polo recoñecemento dos Premios Mestre Mateo, os galardóns de referencia do audiovisual galego, onde foi distinguido como mellor documental.
Esta será a segunda parada do ciclo ‘Afiando Fouciños’, unha iniciativa creada este ano como antesala dos VI Premios Fouciño, que se celebrarán do 22 ao 24 de outubro en Baio e que nesta edición se centran na animación galega.
O ciclo desenvolve durante as catro semanas anteriores ao festival unha programación de catro proxeccións documentais en Baio e Zas, coa intención de ampliar a oferta audiovisual e achegar á veciñanza diferentes propostas relacionadas coa memoria, a cultura e a realidade do territorio.
Tras a sesión inaugural do pasado 26 de setembro, dedicada ao documental ‘O río do Porto, o río grande da Terra de Soneira’, ‘Afiando Fouciños’ chega agora a Zas con ‘360 Curvas’. A programación continuará nas próximas semanas con ‘Crónicas dun Non’ e ‘Deuses de Pedra’, prevista esta última para o 18 de outubro no Local Fouciño de Baio.
