O Concello de Zas manifestou a súa oposición á proposta do Instituto Nacional de Estatística (INE) de fusionar as mesas electorais da parroquia de Muíño e a localidade de Pudenza de cara ás eleccións xerais do vindeiro 29 de novembro. Esta decisión vén motivada pola cifra de 190 electores, que non acada o mínimo de 200 esixido pola Lei 5/1985, do 19 de xuño, Orgánica do Réxime Electoral Xeral.
O Responsable do Censo Electoral e do Padrón do INE comunicou ao Concello a necesidade de atopar unha solución. Dende o Executivo local recoñecen a normativa, pero subliñan que a diferenza é mínima (10 persoas) e que, nun municipio envellecido, rural e con menos de 5.000 habitantes, podería dificultar o acceso ao voto da veciñanza.
O alcalde de Zas, Manuel Muíño, sinalou nun comunicado remitido ao INE que a dispersión poboacional, as dificultades da infraestrutura viaria e as condicións meteorolóxicas previstas para a data das eleccións poderían complicar o transporte dos maiores, incrementando a abstención se se eliminase a mesa.
Segundo Muíño, a lei non ten en conta as particularidades dos concellos pequenos e galegos, a diferenza do que ocorre con municipios como o de Madrid. O Goberno local defende o dereito ao voto e propón manter todas as mesas existentes na última xornada electoral.
Finalmente, o Concello de Zas advirte que empregará "todas as medidas legais que se estimen oportunas" para evitar a fusión das mesas de Muíño e Pudenza.
