O desenvolvemento do proxecto, que busca ordenar unha superficie de 437.812 metros cadrados, deberá incluír unha nova análise do terreo debido á advertencia da Dirección Xeral de Patrimonio Cultural sobre a posible existencia de bens arqueolóxicos non catalogados. A análise suxire que o ámbito podería atoparse no medio dunha importante necrópole neolítica, con indicios de túmulos non rexistrados.
O informe ambiental estratéxico conclúe que o plan non xerará efectos adversos significativos se se cumpren as condicións establecidas en materia de paisaxe, patrimonio cultural, abastecemento, saneamento, tráfico e ruído. Non obstante, Patrimonio Cultural sinala que a prospección arqueolóxica actual data de 2009 e non se axusta a unha investigación específica deste ámbito, senón a un estudo xeral do termo municipal de Zas.
Por este motivo, exíxese unha nova prospección que abarque todo o ámbito do plan e arredores, para identificar posibles xacementos e bens patrimoniais. Tamén se requirirá a elaboración dun catálogo detallado e o sometemento das obras a un control arqueolóxico exhaustivo, incluíndo a remoción de terras e os traballos de desbroce.
A normativa do plan deberá contemplar o réxime de autorizacións para bens catalogados e asegurar que as obras non afecten a infraestruturas hidráulicas nin a bens etnolóxicos. O plan, que se articula sobre o sector de solo urbanizable industrial AR-Sector-I3 (Polígono Monte Vello), tamén prevé zonas verdes e parcelas para edificacións de ata dúas plantas.
O recinto, situado ao noroeste do concello entre Baio e o polígono industrial da Cebola de Abaixo, contará cunha malla viaria xerarquizada cun acceso principal desde a AC-404 e unha nova conexión cara ao leste.
