O Grupo de Acción Local do Sector Pesqueiro (GALP) Costa da Morte pon en marcha unha iniciativa de turismo mariñeiro que permitirá aos visitantes coñecer de preto a actividade marítimo-pesqueira da localidade. A experiencia, enmarcada no proxecto Mar e Rías: Pesca & Turismo, conta coa participación de María Jacqueline Lista Fateira, mariscadora de Camariñas, quen actuará como guía.
A ruta, que se desenvolverá o venres 18 de setembro, de 11:00 a 12:30 horas, partirá da estatua da Danza de Arcos no paseo marítimo. Ao longo do percorrido, os asistentes poderán coñecer os diferentes oficios vinculados ao mar, os tipos de embarcacións como as de artes menores ou cerco, e as artes de pesca tradicionais, incluídas as nasas. Tamén se abordarán as especies capturadas e as particularidades do traballo mariñeiro.
O obxectivo é achegar unha visión práctica da realidade pesqueira de Camariñas, destacando non só as embarcacións e artes, senón tamén as persoas, os coñecementos e as formas de traballo que dan vida ao porto e forman parte da identidade mariñeira da vila.
A visita finalizará na lonxa de Camariñas, onde se explicará todo o proceso desde a chegada do peixe e marisco ao porto ata a súa comercialización, completando así a comprensión da actividade pesqueira e o papel dos profesionais e infraestruturas.
Esta proposta nace das accións formativas do proxecto Mar e Rías: Pesca & Turismo, promovido polos oito GALP galegos, e busca poñer en valor o patrimonio marítimo-pesqueiro e dar visibilidade aos oficios locais a través do turismo.
A actividade é gratuíta e as persoas interesadas poden inscribirse chamando ao teléfono 618 320 033.
