A Asociación de Empresarios e de Promoción Turística (Aept), co patrocinio da Deputación da Coruña e a colaboración do Concello, organiza do 24 ao 26 de xullo unha nova edición do evento Encaixe no Camiño en Camariñas. A iniciativa busca poñer en valor a historia e a artesanía da localidade, complementada cunha festa gastronómica.
O venres, ás 17.00 horas, inaugurarase o Mercado Medieval, que durante toda a fin de semana ofrecerá postos de artesanía e gastronomía, amenizado con espectáculos de rúa e actuacións musicais. Tamén haberá un desfile de moda.
O sábado 25 de xullo, Camariñas rememorará a visita oficial do rei Afonso IX do ano 1228. A comitiva real partirá ás 11.30 horas dende a Casa de Pedra cara ao porto, onde o monarca será recibido por veciños e autoridades.
O domingo 26, a xornada comezará coa partida da comitiva do rei Afonso IX cara a Cereixo (Vimianzo), con parada en Xaviña, onde se recreará teatralmente a viaxe do monarca.
Pola tarde, arredor das 18.30 horas, chegará ao porto a figura dunha dama italiana, que segundo a lenda, ensinou a palillar ás mulleres de Camariñas. Esta historia tamén se escenificará, e complementarase cun desfile de moda e unha exhibición en vivo de palilleiras locais.
Ademais das actividades históricas, o sábado pola tarde, a partir das 19.00 horas, celebrarase na Praza do Mercado a Festa do Marisco, coa actuación musical do grupo O Tren da Unha.
