A Corporación municipal de Camariñas aprobou o expediente que pon en marcha o proceso para a adxudicación das concesións administrativas dos nichos de nova construción no cemiterio. O canon establecido para cada un destes espazos é de 1.160,99 euros.

Para facilitar o acceso a estas concesións, o Goberno local deseñou un sistema de pago en dúas etapas. As persoas interesadas deberán abonar un 20% do importe total no momento de formalizar a solicitude, mentres que o 80% restante se fará efectivo unha vez que o nicho sexa adxudicado de forma definitiva.

A adxudicación realizarase mediante un procedemento de concorrencia, no que o Concello aplicará unha orde de prioridade baseada en criterios de baremación obxectivos. Unha vez elaborada a listaxe definitiva de adxudicatarios, a asignación física do nicho concreto a cada familia efectuarase a través dun sorteo.

O prazo para presentar as solicitudes abrirase oficialmente o día seguinte á publicación do anuncio no Boletín Oficial da Provincia, segundo informaron fontes do Goberno local.