A Asociación Para a Defensa do Patrimonio Cultural Galego (APATRIGAL) solicitou ao Concello de Melide medidas de protección para o cruceiro situado na zona das orquestras, preto da igrexa de San Roque, ante o inicio das Festas de San Roque. APATRIGAL invoca a Lei 5/2016 do patrimonio cultural de Galicia, que establece un contorno de protección subsidiario de 20 metros para os cruceiros, argumentando que na edición anterior das festas non se cumpriron estas esixencias legais.
Este cruceiro de pedra, coñecido como "Cruceiro de Melide", é considerado por moitos como o máis antigo de Galicia, datando probablemente do século XIV. O anverso presenta unha talla de Cristo Maxestade sedente, mentres que o reverso representa un Calvario.
Dende o Concello de Melide responderon de xeito claro, afirmando o seu "compromiso firme coa defensa dos bens culturais". O goberno local sinalou que xa restaurou o propio cruceiro, "póndoo en valor", e considera "suficiente" a protección que se vai realizar, a cal tamén permitirá que as festas, "un importante motor económico para Melide", se poidan realizar no seu emprazamento tradicional.
