O proxecto de mellora da pavimentación e da seguridade viaria da Pista de Maceda e outras vías conta cun investimento de 408.580,95 euros. Inclúe actuacións na Pista de Maceda, na pista de acceso a Corral do Medio por Panadeiros e en pistas da parroquia de San Cosme. Os traballos contemplan a limpeza e acondicionamento de cunetas e bordos, a mellora do firme e a renovación da pavimentación e sinalización horizontal. Na pista de Corral do Medio a San Xiao reforzarase o firme con formigón debido ao tránsito de vehículos pesados. O prazo de execución é de catro meses.
A ampliación do cemiterio municipal de Furelos conta cun orzamento de 83.076,03 euros, respondendo á falta de nichos dispoñibles e a novas solicitudes veciñais. O proxecto inclúe a construción dun novo módulo de nichos, mantendo a configuración e materiais acordes cos existentes, como o granito. Tamén se prevé a adecuación do espazo para garantir a accesibilidade e seguridade. A actuación conta coas autorizacións de Patrimonio Cultural e Medio Ambiente, mentres que as de Augas de Galicia e Sanidade están en trámite.
Ademais, o Pleno aprobou o convenio de colaboración entre os concellos de Melide, Arzúa, Santiso, Toques e Vilasantar para dar continuidade á xestión compartida do Servizo de Atención Temperá. Solicitarase unha subvención da Xunta de Galicia para o período 1 de novembro de 2026 ao 31 de outubro de 2028. Melide continuará como concello promotor, xestionando a axuda e a contratación do servizo para a poboación infantil de 0 a 6 anos.
