O Concello de Vilalba, a través da área de Urbanismo, levará a cabo proximamente un proxecto para o agrupamento de terras de uso agrario. Esta iniciativa, cualificada de "pioneira" na comarca da Terra Chá e en termos de financiamento, busca combater a dispersión e o minifundismo no rural.
O vicealcalde, Modesto Renda, destacou que a medida, inspirada no modelo do Concello de Friol, será financiada ao 100% polo propio Concello, cubrindo tamén a totalidade dos gastos notariales e rexistrais para os veciños que desexen permutar as súas propiedades.
Renda sinalou que esta acción asume "competencias impropias" ante a "total e inexplicable parálise" da Xunta de Galicia coas concentracións parcelarias de Román, Goiriz e Lanzós, que levan máis de 15 anos paralizadas. O obxectivo é favorecer a creación de fincas de gran tamaño que melloren a rendibilidade das explotacións agrarias.
Estas axudas executaranse baixo a Lei de recuperación da terra agraria de Galicia, garantindo a "liberdade absoluta dos interesados". Os intercambios deberán ser consensuados, bilaterais e mutuos entre os donos dos predios. A creación de extensións cómodas, o aforro de custos e tempo, a optimización de maquinaria e o freo do abandono de terreos son outros beneficios deste proxecto.
As solicitudes presentaranse en modelo normalizado, dispoñible na sede electrónica e web do Concello. A receptividade da idea nas parroquias foi "moi boa", segundo Renda, e xa se recibiron "multitude de chamadas telefónicas" de interese. Tras as festas de San Ramón, haberá unha reunión informativa.
O prazo de presentación de solicitudes estará marcado pola publicación das bases no Boletín Oficial da Provincia (BOP). Inicialmente dun mes, ampliarase a tres meses tras recomendación de sindicatos agrarios. A modificación das bases reguladoras publicarase previsiblemente a próxima semana, momento a partir do cal se abrirá o novo prazo.
