A actividade, denominada Guitiriz en Ruta, combina a Ruta das Minas coa Ruta do Ferrocarril. Trátase dun itinerario de dificultade baixa que suma uns 16 quilómetros de distancia, deseñado para fomentar a práctica deportiva e o contacto coa natureza.
A expedición partirá ás 9:00 horas desde a praza do Campo da Feira, en Guitiriz, e prevese que o regreso ao mesmo punto teña lugar arredor das 19:00 horas. A organización aconsella aos participantes levar calzado axeitado, protección solar e bastóns, ademais de comida e bebida para a xornada.
O prazo para formalizar a inscrición remata o venres 25 de setembro ás 14:00 horas. Os interesados poden anotarse de xeito presencial ou chamando ao teléfono 982 370 109. A actividade ten un custo de 5 euros para persoas empadroadas e 10 euros para as non empadroadas, mentres que os menores de 14 anos poderán participar de balde, sempre que estean acompañados por unha persoa adulta.
