Os efectivos pertencen ao quinto batallón da UME, con sede en León, e chegaron a Rábade o pasado luns nunha caravana de preto de trinta vehículos. A súa base loxística instalouse no pavillón municipal e no campo de fútbol da localidade, grazas á colaboración co Concello, e permanecerán alí ata o vindeiro venres.
Desde Rábade, os militares desprázanse ao Campo de Manobras e Tiro (CMT) de Parga, en Guitiriz, onde concentran gran parte das súas actividades. Tamén realizan prácticas fóra destas instalacións, noutros puntos de Guitiriz e do concello limítrofe de Begonte. Este plan de adestramento está coordinado pola Dirección Xeral de Defensa do Monte, dependente da Consellería de Medio Rural.
“"Estamos realizando prácticas de defensa de punto sensible e acondicionamento de accesos para a propia defensa."
O brigada Gustavo Iglesias, de comunicación do quinto batallón da UME, confirmou que estas prácticas están enfocadas na preparación para a campaña de verán de 2026. Subliñou que, en caso de activación por risco de grandes incendios, serán os efectivos deste batallón os encargados de desprazarse a Galicia para colaborar cos equipos de emerxencias locais.
