A mostra, que estará exposta ata o 15 de novembro, é froito da doazón de 194 pezas por parte de Puentes Romay, doutor en Latín e expresidente da Sociedad Española de Estudios Clásicos. A colección destaca polo seu valor histórico e artístico, con pezas procedentes de Alemaña, Francia, Suíza ou Portugal, incluíndo xoias como un reloxo parisiense da casa Farcot, un regulador Gustav Becker ou un mecanismo cinético de 24 bólas.
Detrás desta achega cultural atópase a profunda conexión de José Antonio Puentes co concello de Muras. Aínda que desenvolveu unha traxectoria académica e profesional destacada, o seu vínculo co municipio fíxose máis forte a finais de 1988 coa compra da casa de Carballal. Tras a súa xubilación no 2013, a súa vida transcorría en Muras a maior parte da semana, chegando a tocar as campás para as misas locais.
A paixón de Puentes Romay polo patrimonio tamén se reflectiu na conservación da Casa de Carballal e na formación da súa colección de reloxaría. Moitas das pezas expostas foron adquiridas a veciños de Muras, restauradas no concello con colaboración local, e algunhas das súas caixas foron fabricadas por artesáns murenses como Toñito das Ucheiras.
O Concello de Muras expresa o seu orgullo e agradecemento polo legado, convidando á cidadanía a visitar o Museo Provincial de Lugo. Alén da colección de reloxos, o museo alberga outros tesouros como o Torque de Burela, mosaicos da Lucus Augusti romana, sartegos medievais e obras de artistas como Castelao ou Maruja Mallo.
