Unión Fenosa Distribución promove o proxecto desta nova liña eléctrica, que afectará a 14 parroquias e 58 aldeas do municipio estradense. Para facilitar a asistencia dos veciños, as xuntanzas celebraranse en parroquias con situación intermedia no trazado.
A primeira reunión terá lugar en Cereixo ás 18:00h no local social, mentres que a segunda será en Loimil ás 20:30h no local do palco. Ambas as sesións estarán abertas a todos os veciños e veciñas das parroquias afectadas.
Durante os encontros, representantes municipais, xunto a técnicos de Tysgal (empresa contratada polo Concello), informarán sobre o proxecto e o trazado previsto. Tamén se resolverán as dúbidas dos afectados, orientarase sobre o procedemento de alegacións e poranse á disposición modelos para facilitar este trámite.
O prazo para presentar alegacións remata o vindeiro 20 de outubro. O trazado previsto afecta a parroquias como San Paio da Estrada, A Somoza, Agar, Cereixo, Curantes, Guimarei, Lagartóns, Lamas, Loimil, Orazo, Ouzande, Remesar, Rubín e Tabeirós.
