A localidade de Soutelo de Montes enfróntase a problemas de subministro de auga potable dende este luns debido a unha avaría na rede municipal. Aínda que os técnicos localizaron e repararon o fallo na mesma xornada, a escasa achega dos mananciais impediu a recuperación do depósito principal, xerando a falta de caudal e baixas presións para os veciños.
A recuperación do depósito está a ser extremadamente lenta debido ao caudal mínimo dos mananciais, o que fai insuficiente o enchido para cubrir a demanda diaria. Para paliar esta situación, a administración local activou o uso de camións cisterna para subministrar auga de forma extraordinaria ao longo deste martes.
O Concello confirmou que se manterán cortes preventivos nocturnos durante os días necesarios para permitir que as reservas se recompoñan. Esta medida busca evitar restricións máis severas nas próximas semanas.
O goberno municipal sinala que a problemática da falta de auga non é exclusiva de Soutelo de Montes, senón que se atribúe á prolongada ausencia de precipitacións nos últimos meses. Por iso, fan un chamamento urxente á prudencia e á responsabilidade no uso da auga en todo o municipio de Forcarei.
