A celebración gastronómica, declarada Festa de Interese Turístico de Galicia, superou as expectativas cunha resposta espectacular do público, que encheu a praza e degustou preto de 6.000 racións do afamado produto.

A xornada comezou coa comitiva institucional, acompañada pola Banda de Música Municipal de A Estrada, que se desprazou ata o Teatro Principal. Alí, o medallista olímpico Fernando Romay Pereiro, pregoeiro desta edición, pronunciou un discurso cargado de humor e paralelismos entre o salmón e a súa carreira deportiva.

Romay eloxiou o labor dos restauradores estradenses na construción do legado da festa e a arte necesaria para converter un produto esixente nun prato de altura. Foi o primeiro en recibir o Salmón de Ouro, máxima distinción municipal, de mans do conselleiro de Educación, Román Rodríguez, e do alcalde, Gonzalo Louzao, nun momento distendido onde ambos subiron a unha cadeira para impor o recoñecemento ao deportista.

Os recoñecementos continuaron coa entrega do Salmón de Ouro á exalcaldesa Elvira Fernández Díaz, representada pola súa filla María Valladares; aos Premios Mestre Mateo Darío Loureiro Carbia e Ariadna Silva Fernández; e á Academia Galega de Seguridade Pública (Agasp), representada polo director xeral de Emerxencias e Interior, Santiago Villanueva.

O alcalde Gonzalo Louzao destacou o momento especial da festa, onde "tradición e futuro se dan a man", e a "emocionante resposta social" que evidencia a forza do "corazón gastronómico" da celebración. Louzao tamén sinalou a coincidencia co Día das Letras Galegas, comparando o salmón coas letras como "símbolo de resistencia e orgullo", e lembrou os 50 anos da Sociedade Deportiva Río Ulla, "primeira defensora do río" nun contexto de "malos tempos para a pesca do salmón no Ulla".

A festa puxo o seu broche de ouro coa actuación da orquestra París de Noia na Praza de Galicia, poñendo fin a unha edición que consolida a Festa do Salmón como un referente gastronómico e cultural.