A Conselleira de Medio Ambiente e Cambio Climático, Ángeles Vázquez, e a alcaldesa, María Jesús Novo, formalizaron hoxe a colaboración para modernizar o subministro de auga na parroquia de Sendelle. Esta actuación, cun investimento de 40.568 euros achegados integramente pola Consellería, busca resolver incidencias e mellorar a fiabilidade da rede.
Os traballos centrarase na renovación de 715 metros de condución nos lugares de O Piñeiro, O Marco de Arriba, O Vilar, Sande e O Marco de Abaixo, que dan servizo a 51 vivendas e preto de 70 persoas. Inclúense tamén a instalación dunha válvula e a execución de 9 acometidas novas.
Segundo destacou Ángeles Vázquez, a intervención reforzará a calidade do servizo, reducirá as perdas por fugas e asegurará unha presión axeitada e a continuidade do subministro. O prazo de execución previsto é de 3 meses.
Esta colaboración enmárcase na estratexia da Xunta, a través de Augas de Galicia, para apoiar aos concellos na execución de infraestruturas hidráulicas. A iniciativa busca mellorar a calidade de vida, protexer o medio ambiente e garantir servizos públicos esenciais.
A Consellería está a desenvolver máis dunha trintena de intervencións en materia de abastecemento, saneamento e depuración en concellos rurais de Galicia, cun investimento global de preto de 28 millóns de euros, que beneficiarán a unhas 65.000 persoas.
