A conselleira de Vivenda e Planificación de Infraestruturas, María M. Allegue, xunto ao alcalde da Estrada, Gonzalo Louzao, e á directora da Axencia Galega de Infraestruturas, María Deza, supervisou o inicio dos traballos deste novo itinerario, que se cofinancia con fondos europeos FEDER.
Esta actuación enmárcase na aposta da Xunta pola mobilidade segura e sostible, co obxectivo de habilitar unha rede de sendas ao longo das estradas autonómicas para garantir a seguridade dos colectivos máis vulnerables e fomentar hábitos saudables.
O itinerario, cun mínimo de 1,8 metros de ancho, facilitará os desprazamentos seguros na zona de moito tránsito, onde se sitúan servizos como un tanatorio e un equipamento deportivo, conectando o núcleo da Estrada co polígono industrial de Toedo.
A obra inclúe tamén a instalación de estruturas de formigón, a adaptación da rede de drenaxe, a execución de canalizacións para comunicacións, a mellora da sinalización e a habilitación de muros de perpiaños. Ademais, instalarase pavimento podotáctil nos extremos da senda, paradas de bus e pasos de peóns.
Os traballos, cun prazo de execución de 12 meses, foron cualificados pola conselleira como un itinerario “co selo da nosa Galicia Calidade”.
No marco do Plan de Sendas, a Xunta xa habilitou máis de 300 quilómetros de itinerarios en Galicia. Só na provincia pontevedresa, hai quince sendas en marcha cun investimento próximo aos 25 millóns de euros, incluíndo proxectos en concellos como Pontevedra, Marín, Bueu, Meaño, Moraña, Valga, Ponteareas, Mondariz, A Guarda, Moaña, O Porriño, Vigo ou Poio.
Ademais, a conselleira mencionou a execución da segunda fase da prolongación da AG-59 Santiago-A Estrada e actuacións de reforzo de firme nas estradas PO-840, PO-841 e PO-213 na Estrada e Agolada, cun investimento total de 3,6 millóns de euros.
