O sinistro produciuse ao redor das 14.00 horas, nas proximidades da Ponte da Áspera, un punto significativo da ruta xacobea ao seu paso por Sarria. O vehículo circulaba en dirección a San Lázaro cando se despistou pola marxe dereita nun tramo curvo, impactou contra un muro e envorcou, quedando finalmente en sentido contrario á súa marcha.

O servizo de emerxencias 112 Galicia recibiu o aviso a través do sistema de alerta automático do propio coche. Tras a chamada, mobilizáronse axentes da Policía Local de Sarria, encargados de elaborar o atestado e realizar a proba de alcoholemia ao condutor, que arroxou un resultado de 0,0.

Ademais, desprazáronse ao lugar efectivos da Garda Civil e unha ambulancia. Esta última trasladou ao copiloto ao Hula, mentres que os outros dous ocupantes tamén acudiron a centros sanitarios para recibir asistencia médica. Por fortuna, no momento do suceso non circulaba pola vía ningún outro vehículo nin tampouco peregrinos.